自由职业/自雇教练

自我介紹同埋我點樣形容我嘅工作:

我的名字係阿豪,我嚟自香港。我係一個自僱嘅戶外教練,俗稱「freelancer」。

向一個唔太認識呢個行業嘅人解釋你嘅工作:

我主要幫助學校、公司或其他機構提供培訓或戶外活動。有時我都會教我嘅朋友,例如教佢哋皮划艇課,因為我係一個皮划艇教練。

身為一個freelancer,我無固定僱主,但我會為不同公司或團體提供服務,帶領佢哋嘅活動。有時我係一個團體嘅教練,有時人哋會聯絡我來組織一些活動,例如歷險旅行、私人露營活動,又或者係兒童活動。

你通常同邊啲人合作?

我通常會同學校合作,包括國際學校同本地學校,帶領團隊建立活動。夏季水上運動較為流行,我會集中做水上活動。當學校九月復課後,我又或者會再次與佢哋合作。冬天嘅時候,我可能會有機會組織一些遠足或登山活動,有時可能會去海外。

由於我唔係為某間公司工作,我大部分工作都係經由朋友介紹或以前客戶滿意我嘅服務而來。我冇特定公司或網上店舖,主要係靠口碑。

身為一個freelancer,我需要自行管理我嘅時間表同活動。一般都會有較忙碌同較閒緩嘅季節 - 通常聖誕後同農曆新年後學校同公司放假期間會比較閒。其他時候我都會盡量保持滿滿嘅時間表,但我都會確保給自己休息時間,例如一個月或幾個星期。

總的來說,freelancer嘅好處就係我可以自主決定何時同為誰工作,但同時我也要主動管理自己嘅時間表和工作量。

你鍾意你嘅工作嘅地方係乜?

我最喜歡嘅就係我係一個戶外教育工作者。所以我嘅工作都係以大自然為本,碳足跡較小。可能會涉及一些野外繩索活動、去到島嶼、海上皮划艇、或者係野外露營。呢個環境我真的好鍾意。而且由於我會同不同公司合作,所以我可能會喺新界、香港島或離島等不同地方工作,我唔會局限於一個地方,而係可以體驗唔同嘅工作環境,我覺得好開心。

你嘅工作有啲咩負面嘅一面?

不過,身為freelancer,我哋都會受到整體經濟環境嘅影響。例如之前嘅疫情期間,好多活動完全停頓,我有好幾個月連一份工都無。同時都可能會有一些繁忙期,有好多公司都在同一時期要求我提供服務,我就要根據之前嘅承諾來決定接受或拒絕。

我哋freelancer每個客戶同公司嘅要求都唔同,所以都需要預先同佢哋討論,了解佢哋嘅需求,確保活動能夠順利進行。

要做呢類工作你需要有咩訓練同經驗?

如果有人想入行呢個行業,有相關經驗是非常重要的,例如皮划艇、繩索課程或其他戶外活動經驗。同時取得一些認證都會有幫助,例如繩索課程、皮划艇或其他感興趣嘅活動。我會建議可以在一些有聲譽嘅戶外培訓學校實習,在哪度可以獲得必要嘅培訓,然後再慢慢累積3-4年嘅經驗。

我強烈建議想發展呢個行業嘅人可以先試試,睇下係咪一個合適嘅選擇,然後有系統地取得自己感興趣嘅特定範疇嘅認證。呢樣嘢可以幫助你建立必要嘅專業知識和資格。

另外一個建議就係,呢個行業我哋經常可以接觸不同背景嘅學生同參加者,呢個可以帶來好大嘅滿足感,同時都可以留下珍貴嘅回憶。

我可以為學生哋提供美好嘅回憶,或許會影響佢哋一生。如果我哋有任何小小失誤,又或者令佢哋有壞經驗,佢哋以後可能永遠都唔想再接觸呢個活動或者大自然。我希望如果大家真係想投身呢個行業,都可以考慮呢一點。你做呢個工作嘅目的,唔單單只為咗錢?或者我哋可以幫助一個原本唔鍾意外出或者唔鍾意接觸大自然嘅小朋友,但經過同我哋相處咗幾日之後,可能就改變咗觀點。就好似係植咗一顆種子喺佢哋心入面,最終佢哋可能就會繼續向這個正面嘅方向發展。可能佢哋將來唔會就業於呢個行業,但總之有機會去爬更多山、花更多時間於大自然中,同時都可能學會多啲去保護大自然。

比如我鍾意皮划艇,所以我希望可以用皮划艇去幫助其他人認識到如何減少廢物同污染。我哋會安排到不同嘅沙灘去清潔。我希望用我自己小小嘅力量,都可以感染周圍嘅人,令到大家都可以繼續保護我哋美麗嘅環境,唔只係香港,希望佢哋學習之後都可以影響到世界各地。這樣當大家返回大自然時,就唔會製造太多垃圾,又唔會破壞環境。咁樣呢樣野都可以延續落去,留俾下一代,佢哋都可以繼續欣賞呢個靚嘅大自然。